• Hong!

    Dorna Katohyan

    Kumaha teu keuheul tuda! Geus lantip sagala usaha teh, derr make jeung katohyan... Ibur di dua nagara, Dorna kabur bari mawa rusiah ngeunaan duit nu leungit basa kontraktor ngawangun wisma pikeun latihan gelut di sisi Kurusetra. Mangkaning lain duit eutik-eutik, pajar teh duitna dipake keur ngolo Duryudana. Hese meunang tender ngawangun wisma teh, mun si eta teu diolo mah! Nu jadi masalah, duit keur nyogok teh meunang menta boh ti Kurawa boh ti Astina.

    Geus kaboker mah, Dorna ngereles. Pandawa jeung Kurawa sarua riweuhna neangan Dorna. Mangkaning eta jalma sakti teh make jeung robah wujud ngajadi pamuda sampulur bodas, gagah pertentang, bangir, kasep kagila-gila. Atuh beuki hese neanganana, komo aya beja Dorna teh sigana di luar nagara. Newak Dorna di luar nagara mah beuki riweuh ku prosedur jeung ongkos...

    Kresna oge teu mampuh mere bongbolongan, kaca lopian boga manehna keur nge-hang ceunah pajar teh. Basa didatangan ku para pandawa teh, eta batara keur teu di kantorna. Ditelepon ku Arjuna, jawabna keur sibuk nga-upgrade software lopian tea. Lopian teh diserang hacker, virusna ampuh pisan.

    Antukna Arjuna kapaksa menta tulung ka Sumbadra, pamajikanana nu keur meujeuhna sibuk jadi presenter tipi. Bubuhan geulis jeung wanian, Sumbadra kapake pisan mawa acara talk-show anu rating-na meh ngelehkeun Kick Bima jeung Penghuni Terpakir. Disaluyuan ku Sumbadra eta pamenta teh, pihak tipi oge bakal ngusahakeun bisa maluruh Dorna. Mun bisa nginterpiuw Dorna, tada teuing iklan rabul minuhan acara.

    Ari tumerapna ka Dorna... Dorna tea apanan apesna ku Sumbadra. Barang hapena disada oge, tur pagawe kantor tipi nelepon, manehna geus kaburu muriang tiheula barang dibejaan Sumbadra rek nginterpiuw teh.

    "Alus milik aing yeuh, ajoww!!" Dorna nepi ka engkle-engklean...

    Gara-gara nedunan diwawancara ku tipi ahirna Dorna dicangkalak ku Gatotgaca! Teu pira sababna mah, basa keur diwawancara via telepon, hawar-hawar karungu sora siga bel di satukangeun sora Dorna. Harita mangsa keur beurang entrang-entrangan.

    "Di deukeut Leuweung Dedemit pa!!" gorowok teh si Cepot, bari nepak bapana. Ua Semar nepi ka cireumbay da kapelag sampeu badag pisan... Sampeu nu kuduna ni'mat teh kalah jadi mamala. Mun teu dibantuan ku si Dawala mah, sigana eueureuleuan terus bapa Semar teh beakeun napas.

    "Sia teh apal timana??" Ua Semar nanya sanggeus leler kapelagna, kabantu ku nginum heula cikopi deuih sabekong.

    "Eta paaa, aya sora Si Gareng di satukangeun sora Dorna dina tipi!! Yakin uing mah pa!! Da euweuh deui atuh distributor tunggal Kari Roti keur wilayah Astina jeung Amarta mah iwal ti Si Gareng. Maenya bapa teu apal sora laguna, puguh eta jinggel lagu Kari Roti, laras Kinanti! Jam sakieu mah manehna keur aya di wilayah deukeut Leuweung Dedemit pa!!"

    "Heueuh pa!!" Dawala ngahaminan bari disusul ku ngahuapkeun sampeu. Teu lila jejebres bari sebah sebuh, sabab salah ngasupkeun, ngadon bako padudan Ua Semar nu rek diteleg teh.

    Semar unggut-unggutan.

    "Buru telepon Mas Gatot di KPK! Alus sia berbakat jadi ditektip, Cepot!"

    No comments:

    Post a Comment

    Sajak

    Opini

    Résénsi